"Ньюкасл" бош мураббийи Эдди Хау Чемпионлар лигаси 1/8 финалининг бўлажак қуръаси ҳақида ўз фикрларини билдирди. Ушбу босқичда "қарғалар" ё "Челси", ёки "Барселона" жамоаларидан бирига қарши майдонга тушадилар.
"Ўйлайманки, биз шунчаки "Манчестер Сити" билан тўқнаш келмаслигимиздан миннатдормиз. Натижаларни интиқлик билан кутяпмиз. Қизиғи шундаки, биз бир ҳафта ичида "Челси"га қарши учта ўйин ўтказишимиз мумкин. Уларга қарши ўз уйимизда ажойиб ўйин ўтказгандик — менимча, ўшанда жуда яхши ҳаракат қилганмиз. Мен уларни ҳурмат қиламан. Ўша ўйиндан бери уларда мураббий алмашди.
"Барселона" билан ҳам ўз уйимизда жуда яхши ўйнагандик. Ким тушишидан қатъи назар, биз учун бу ҳаяжонли қарама-қаршилик бўлади", — деди Хау матбуот анжуманида.
Эслатиб ўтамиз, Чемпионлар лигасининг ўтиш босқичида "Ньюкасл" "Қорабоғ" жамоасини икки ўйин натижасига кўра 9:3 ҳисобида қийинчиликсиз мағлуб этган эди.
