"Manchester Yunayted"ning sobiq o‘yinchisi Li Sharp mankunianliklar APLda chempionlikka da’vogar jamoalardan unchalik ortda emas deb hisoblaydi.

"Menimcha, ular titul uchun kurashuvchilardan unchalik uzoq emas. Kerrik kelishi bilan bir nechta top-jamoalarni mag‘lub etib, buni isbotlashdi. "Everton"ga qarshi o‘yinda ular juda ishonchli ko‘rinishdi. Hujumda, uzatmalarda unchalik murakkab va ajoyib o‘yin ko‘rsatishmagan bo‘lsa-da, jamoaviy ruh va shijoat namoyish etishdi. Vaholanki, bu xislatlar bundan ikki oy avval kerakli darajada emas edi. Qiyin bo‘ldi, lekin ular natijaga erishishdi.

Ular yaxshi ish olib borishmoqda. Uchinchi o‘rindan atigi ikki-uch ochko ortda qolishyapti va top-2 jamoalariga ham yaqin kelib qolishdi. Agar mavsumga umumiy nazar tashlasak va yo‘qotilgan ochkolarni hisobga olsak, ular ancha yaqinroq bo‘lishlari mumkin edi. Menimcha, yozda 3-4 ta top-darajadagi transferlar amalga oshirilsa, natijalar barqaror bo‘lsa va tinimsiz mehnat qilinsa, ular chempionlik poygasidan umuman uzoq bo‘lishmaydi", — dedi Sharp.