"Манчестер Юнайтед"нинг собиқ ўйинчиси Ли Шарп манкунианликлар АПЛда чемпионликка даъвогар жамоалардан унчалик ортда эмас деб ҳисоблайди.

"Менимча, улар титул учун курашувчилардан унчалик узоқ эмас. Кэррик келиши билан бир нечта топ-жамоаларни мағлуб этиб, буни исботлашди. "Эвертон"га қарши ўйинда улар жуда ишончли кўринишди. Ҳужумда, узатмаларда унчалик мураккаб ва ажойиб ўйин кўрсатишмаган бўлса-да, жамоавий руҳ ва шижоат намойиш этишди. Ваҳоланки, бу хислатлар бундан икки ой аввал керакли даражада эмас эди. Қийин бўлди, лекин улар натижага эришишди.

Улар яхши иш олиб боришмоқда. Учинчи ўриндан атиги икки-уч очко ортда қолишяпти ва топ-2 жамоаларига ҳам яқин келиб қолишди. Агар мавсумга умумий назар ташласак ва йўқотилган очколарни ҳисобга олсак, улар анча яқинроқ бўлишлари мумкин эди. Менимча, ёзда 3-4 та топ-даражадаги трансферлар амалга оширилса, натижалар барқарор бўлса ва тинимсиз меҳнат қилинса, улар чемпионлик пойгасидан умуман узоқ бўлишмайди", — деди Шарп.