Madridning "Real" klubi yarim himoyachisi Jud Bellingemning Angliya terma jamoasidagi istiqbollari noaniqligicha qolmoqda.

22 yoshli futbolchi fevral oyi boshida "Rayo Valyekano"ga qarshi o‘yinda olgan jiddiy jarohati sababli safdan chiqqan edi. "MatchDay Central" nashrining xabariga ko‘ra, "uch sherlar" bosh murabbiyi Tomas Tuxel Bellingemni shu yilning iyun-iyul oylarida AQSH, Kanada va Meksikada bo‘lib o‘tadigan Jahon chempionati qaydnomasiga kiritmasligi mumkin.

Germaniyalik mutaxassis agar "Real" yulduzi turnir boshlanishiga qadar eng yaxshi jismoniy holatga kira olmasa, uning nomzodidan voz kechishga tayyor. Murabbiylar shtabining prinsipi shunday: mundialga futbolchining obro‘sidan qat’i nazar, faqat ideal darajada tayyor bo‘lgan o‘yinchilar yo‘l oladi.

Eslatib o‘tamiz, Bellingem hozirda tiklanish jarayonini o‘tamoqda va uning mart oyidagi Urugvay hamda Yaponiyaga qarshi o‘rtoqlik uchrashuvlarini o‘tkazib yuborishi deyarli aniq bo‘lib ulgurgan.