Ispaniyaning “Real Madrid” klubi sobiq yarim himoyachisi va murabbiyi Zinedin Zidan L’Equipe nashriga bergan intervyusida Mayk Taysonning janglarini qanday tomosha qilgani haqidagi xotiralari bilan o‘rtoqlashdi.

“Uning janglarini jonli efirda ko‘rish uchun tunda uyqudan turardim. Hattoki ular bor-yo‘g‘i bir daqiqa davom etsa ham, budilnikni to‘g‘rilab qo‘yardim. Kan shahridagi yotoqxonada Devid Bettoni bilan yashaganimizda, bizda Canal+ bor edi. Jangni ko‘rib bo‘lgach, yana uxlashga yotardik. Jang qancha davom etishini hech qachon bilmasdik, lekin baribir ko‘rishni istardik”, deydi Zidan.

Fransiyalik mutaxassis Taysonning uslubiga alohida urg‘u berdi:

“Men har doim boksni yaxshi ko‘rganman. Bu men shug‘ullanishim mumkin bo‘lgan sport turi emas, lekin u juda go‘zal. Chempionlar o‘ziga xos uslub, kuch va nafosat bilan jang qilishini, shu bilan birga bir-birlarini hurmat qilishini ko‘rish mumkin. Mayk Taysonning uslubi Muhammad Alinikiga o‘xshamasdi, lekin uning energiyasini yoqtirardim. Unda o‘ziga xos hissiyot va kuch borligi sezilib turardi. Uning hayot yo‘li juda ta’sirli. Har bir buyuk chempionning ortida doim o‘z hikoyasi bo‘ladi”.

Avvalroq Zinedin Zidan 2026 yilgi Jahon chempionatidan keyin Fransiya terma jamoasi bosh murabbiyi etib tayinlanishi borasida mamlakat futbol federasiyasi bilan og‘zaki kelishuvga erishgani xabar qilingan edi.

53 yoshli Zidan 2021 yil iyun oyida Madrid klubi bosh murabbiyi lavozimini tark etgan edi va o‘shandan beri hech qaysi klub yoki terma jamoada faoliyat yuritmagan.