Испаниянинг “Реал Мадрид” клуби собиқ ярим ҳимоячиси ва мураббийи Зинедин Зидан L’Equipe нашрига берган интервьюсида Майк Тайсоннинг жангларини қандай томоша қилгани ҳақидаги хотиралари билан ўртоқлашди.

“Унинг жангларини жонли эфирда кўриш учун тунда уйқудан турардим. Ҳаттоки улар бор-йўғи бир дақиқа давом этса ҳам, будилникни тўғрилаб қўярдим. Кан шаҳридаги ётоқхонада Девид Беттони билан яшаганимизда, бизда Canal+ бор эди. Жангни кўриб бўлгач, яна ухлашга ётардик. Жанг қанча давом этишини ҳеч қачон билмасдик, лекин барибир кўришни истардик”, дейди Зидан.

Франциялик мутахассис Тайсоннинг услубига алоҳида урғу берди:

“Мен ҳар доим боксни яхши кўрганман. Бу мен шуғулланишим мумкин бўлган спорт тури эмас, лекин у жуда гўзал. Чемпионлар ўзига хос услуб, куч ва нафосат билан жанг қилишини, шу билан бирга бир-бирларини ҳурмат қилишини кўриш мумкин. Майк Тайсоннинг услуби Муҳаммад Алиникига ўхшамасди, лекин унинг энергиясини ёқтирардим. Унда ўзига хос ҳиссиёт ва куч борлиги сезилиб турарди. Унинг ҳаёт йўли жуда таъсирли. Ҳар бир буюк чемпионнинг ортида доим ўз ҳикояси бўлади”.

Аввалроқ Зинедин Зидан 2026 йилги Жаҳон чемпионатидан кейин Франция терма жамоаси бош мураббийи этиб тайинланиши борасида мамлакат футбол федерацияси билан оғзаки келишувга эришгани хабар қилинган эди.

53 ёшли Зидан 2021 йил июнь ойида Мадрид клуби бош мураббийи лавозимини тарк этган эди ва ўшандан бери ҳеч қайси клуб ёки терма жамоада фаолият юритмаган.