«Liverpul» klubining argentinalik yarim himoyachisi Aleksis Mak Allister gol urishni yaxshi ko‘rishini tan oldi.
«Jarima maydonchasi ichida paydo bo‘lish va gol urish menga juda yoqadi. Ba’zan bu amalga oshadi, ba’zan esa yo‘q... Men xursandman, chunki jamoamga yordam berish bilan birga o‘z kuchimga bo‘lgan ishonchni ham oshirib boryapman», — deya Mak Allisterning so‘zlarini keltiradi «The Touchline».
Angliya Premyer-ligasining 28-turidan o‘rin olgan bahsda «Liverpul» o‘z maydonida «Vest Xem»ni 5:2 hisobida mag‘lubiyatga uchratdi. Argentinalik futbolchi maydonda to‘liq 90 daqiqa harakat qildi va mersisaydliklarning gollaridan biriga mualliflik qildi.
27 yoshli Mak Allister joriy mavsumda jami 39 ta uchrashuvda maydonga tushib, o‘z hisobiga beshta gol va to‘rtta golli uzatmani yozdirib qo‘ydi.
