"Bavariya" bosh direktori Yan-Kristian Drizen klubning Chempionlar ligasi to‘rining qiyin qismiga tushib qolgani haqida gapirdi. Agar myunxenliklar "Atalanta" to‘sig‘idan o‘tishsa, ular "Real" — "Manchester Siti" juftligi g‘olibi bilan to‘qnash kelishadi.

"To‘rning o‘ng tomoni ancha osonroq ekani ko‘rinib turibdi. Agar chap tomonga tushganimizdan xursandmiz desam, bunga hech kim ishonmaydi. Ammo, boshqa tomondan, eng kuchli jamoalarga qarshi o‘ynash va qiyin uchrashuvlar o‘tkazish unchalik yomon emas.

Hozir biz bor e’tiborimizni "Atalanta"ga qaratishimiz kerak. Ularning "Borussiya" bilan bahsidan so‘ng, "Atalanta"ga jiddiy yondashish lozimligini ko‘rdik. Ular allaqachon Yevropa ligasida g‘olib chiqishgan, finalda esa "Bayer"ni mag‘lub etishgan, shuning uchun ularni noma’lum jamoa deb bo‘lmaydi. Hozir bor diqqatimiz "Atalanta"da, keyinchalik nima bo‘lishini esa ko‘ramiz", — deya Drizenning so‘zlaridan iqtibos keltirmoqda "Bayern & Germany" nashri.

Dastlabki o‘yinda "Atalanta" 10 mart kuni "Bavariya"ni qabul qiladi.