"Inter Mayami" hujumchisi Lionel Messi o‘zining sermahsulligi bilan futbol jamoatchiligini hayratda qoldirishda davom etmoqda. 38 yoshli forvard MLSning yangi mavsumidagi ilk gollarini urdi — u "Orlando Siti"ga qarshi kechgan bahsda (4:2) dubl qayd etdi.

Argentinalik yulduz uchun bu faoliyatidagi 178-dubl bo‘ldi. Futbolchi urgan dubllarning katta qismi "Barselona"dagi faoliyati davriga to‘g‘ri keladi (137 ta). Shuningdek, u Argentina terma jamoasida 14 marta, "PSJ"da esa 5 marta bir o‘yinda ikkitadan gol urishga muvaffaq bo‘lgan.

Lionel Messi o‘zining hozirgi jamoasi safiga qo‘shilganiga hali uch yil ham bo‘lmaganiga qaramay, "Inter Mayami" libosida allaqachon 22 marta dubl qayd etishga ulgurdi. Hozirda hujumchining butun faoliyati davomidagi gollari soni 898 tani tashkil etmoqda.