Markaziy himoyachi Federiko Gattining goli "Yuventus"ga A Seriya doirasida "Roma"ga qarshi kechgan bahsda (3:3) durang natijani taqdim etdi.
Turinliklar o‘yin davomida 1:3 hisobida imkoniyatni boy berayotgan edi, biroq uchrashuv so‘ngida muvozanatni tiklashga muvaffaq bo‘lishdi. So‘nggi vaqtlarda tez-tez tanqidlarga uchrayotgan Gatti 93-daqiqada jamoasini mag‘lubiyatdan qutqaruvchi aniq zarbani yo‘lladi.
"Men og‘ir damlarni boshdan kechirdim. Atrofda shov-shuvlar juda ko‘p va hamma chetdan turib hukm chiqarishga haqliman deb o‘ylaydi. Lekin men hayotda ko‘p narsani ko‘rganman, shuning uchun bu menga bosim o‘tkazmaydi. Muammo shundaki, bu boshqalarni bezovta qilishi mumkin. "Yuventus"da sen qiyinchiliklarni yengib o‘tishni bilishing shart. Men maydonda doimo bor kuchimni berib o‘ynaganman", — dedi Gatti.
Ayni damda "Yuventus" Italiya chempionati turnir jadvalida oltinchi pog‘onani egallab turibdi.
