"Manchester Yunayted" sobiq futbolchisi Gari Nevill Angliya chempionatining 2025/2026 yilgi mavsumi yakunida qaysi jamoalar kuchli to‘rtlikdan joy olishini taxmin qildi.
"Menimcha, "Manchester Yunayted" albatta uchinchi o‘rinni egallaydi. Olti hafta oldingi holatimizni hisobga olsak, bu gapni aytayotganimga o‘zim ham ishonmayman. Ularda chalg‘ituvchi omillar yo‘q, hammasi ko‘ngildagidek ketmoqda va ijobiy dinamika kuzatilyapti. Oldinda qiyin o‘yinlar bor, ularning har biri katta sinovdir.
Menimcha, "Liverpul" to‘rtinchi o‘rinda finish qiladi. Yagona shubha tug‘dirayotgan jamoalar — "Chelsi" va "Aston Villa". Men "Villa" kuchli beshlikdan joy olishiga juda umid qilaman. Avval ham aytganman, ularning murabbiyi tajribali va dono inson. Biroq yarim himoyachilarning jarohatlari so‘nggi haftalarda ularga ancha qimmatga tushdi", — deya Nevillning so‘zlarini keltiradi Sky Sports.













