Yevropaning kuchli beshlik chempionatlarida faqatgina ikkita klub joriy mavsumda safarda hali mag‘lubiyatga uchragani yo‘q. Gap Myunxenning «Bavariya» (bu hech kimni hayron qoldirmaydi) va Italiyaning «Milan» (bu biroz ko‘proq hayratlanarli) klublari haqida ketmoqda.
Mavsum davomidagi ikkita mag‘lubiyatga qaramay, «rossonerilar» hali safar o‘yinlarida imkoniyatni boy berishgani yo‘q — har safar mag‘lubiyat uy uchrashuvlarida qayd etilgan. Natijada, hozirda «Milan»ning mavsum boshidan beri safardagi mag‘lubiyatsiz seriyasi o‘n to‘rtta o‘yinga yetdi.
Klubning mutlaq rekordi 2003/2004 yilgi mavsumda qayd etilgan bo‘lib, o‘shanda «Milan» ajoyib mavsumni o‘tkazib, Italiya chempioniga aylangan va safarda ketma-ket o‘n yettita o‘yinda mag‘lub bo‘lmagan edi.
