«Barselona» markaziy himoyachisi Ronald Arauxo Madridning «Atletiko» klubiga qarshi kechgan va 3:0 (ikki o‘yin natijasiga ko‘ra 3:4) hisobidagi g‘alaba bilan yakunlangan bahsdan so‘ng o‘z taassurotlari bilan o‘rtoqlashdi.

«Ko‘k-anorranglilar» kambek qilishga juda yaqin kelishdi, biroq najotkor to‘rtinchi golni ura olishmadi. Natijada Ispaniya Kubogi finaliga «matraschilar» yo‘l olishdi.

«Agar bundan keyin ham shunday o‘ynashda davom etsak, La Liga va Chempionlar ligasida g‘olib chiqamiz. Jamoamiz o‘zini juda yaxshi ko‘rsatdi — mavsum yakunigacha xuddi shunday yondashuvni saqlab qolish muhim, chunki oldinda hali ko‘plab jiddiy sinovlar kutmoqda», — deya Barca Universal nashri Arauxoning o‘yindan keyingi intervyusidan iqtibos keltirmoqda.

Seshanba kungi bahsda «Barselona» tarkibida dubl qayd etgan Mark Bernal va penaltidan unumli foydalangan Rafinya Dias gol muallifiga aylanishdi.