«Barselona» futbolchisi Rafinya Dias Ispaniya Kubogi yarim finali doirasida Madridning «Atletiko» klubiga qarshi kechgan javob bahsidan so‘ng jurnalistlar bilan suhbatlashdi.

«Ko‘k-anorranglilar» 3:0 hisobida ustun kelishdi, biroq dastlabki uchrashuvda 0:4 hisobida imkoniyatni boy berishgani sababli turnirni tark etishdi.

«Ishoning, agar biz bugungidek o‘ynashda davom etsak, mavsum yakunida aql bovar qilmas voqealarning guvohi bo‘lamiz. Oldinga intilishda davom etishimiz, tushkunlikka tushmasligimiz kerak. Ertaga yangi kun keladi. Ha, biz maqsadimizga erisha olmaganimiz uchun xafamiz, lekin bugun kechqurun ko‘rsatgan o‘yinimizdan faxrlansak arziydi», — deya The Touchline nashri Rafinyaning so‘zlarini keltirmoqda.

Braziliyalik futbolchi ushbu bahsda o‘z hisobiga bitta gol yozdirib qo‘ydi — u penaltini aniq amalga oshirdi. Yarim himoyachi Mark Bernal esa dublni qayd etdi.