Madridning «Real» klubi hujumchisi Kilian Mbappe tizzasidagi xochsimon boylamlar uzilishi sababli safdan chiqqan jamoadoshi Rodrigoni qo‘llab-quvvatladi.
Braziliyalik futbolchi mavsumning qolgan qismini o‘tkazib yuboradi, shuningdek, yozda bo‘lib o‘tadigan Jahon chempionatida o‘z milliy terma jamoasiga yordam bera olmaydi.
«Senga dunyodagi bor kuch-quvvatni tilayman, birodar. Bu vaqtni o‘zingga va oilangga bag‘ishla — shunda sen yanada kuchli bo‘lib qaytasan», — deb yozdi Mbappe ijtimoiy tarmoqlardagi sahifasida.
Taxminlarga ko‘ra, Rodrigoning tiklanish jarayoni kuzgacha davom etadi. Joriy mavsumda 25 yoshli futbolchi «qaymoqranglilar» safida barcha turnirlarda 27 ta o‘yin o‘tkazishga ulgurgan bo‘lib, o‘z hisobiga uchta gol va oltita golli uzatmani yozdirib qo‘ygan edi.
