«Nyukasl» hujumchisi Uilyam Osula Angliya chempionatining 29-turi doirasida «Manchester Yunayted» ustidan qozonilgan g‘alabadan (2:1) so‘ng o‘z fikrlari bilan o‘rtoqlashdi. 22 yoshli daniyalik futbolchi bahsdagi g‘alaba to‘pi muallifiga aylandi.

«Bu dunyodagi eng ajoyib tuyg‘u edi. Men juda baxtiyor edim. Maydonga tushayotganimda, gol urib, o‘yin taqdirini o‘zgartirishni Yaratgandan so‘ragandim va shunday bo‘lgani uchun shukr qilaman. Kecha mashg‘ulotlarda markazga intilish va hujumni yakunlash ustida ishlagandim, shunday ekan, qilingan qattiq mehnat o‘z samarasini berdi. Tanaffus paytida murabbiy menga maydonga tushib, o‘yin jarayoniga ta’sir o‘tkazishim kerakligini aytgandi. Baxtimizga, bugun aynan shunday bo‘ldi», — deya Osulaning so‘zlaridan iqtibos keltirmoqda BBC nashri.

«Nyukasl» 39 ochko jamg‘argan holda APL turnir jadvalida 12-o‘rinni egallab turibdi. «Manchester Yunayted» uchun esa bu mag‘lubiyat Maykl Kerrik boshqaruvidagi birinchisi bo‘ldi. Jamoa 51 ochko bilan 3-o‘rinda bormoqda.