Angliyaning «Liverpul» klubi yozgi mavsumoldi tayyorgarlik doirasida AQSHda Gollivud aktyori Rayan Reynoldsga tegishli bo‘lgan «Reksem» jamoasi bilan uchrashishni rejalashtirmoqda. Bu haqda The Athletic nashri xabar bermoqda.

Shuningdek, mersisaydliklarning AQSHdagi turnesi davomida «Lids Yunayted» va «Sanderlend» jamoalariga qarshi o‘yinlari ham ko‘zda tutilgan. «Reksem» bilan bo‘ladigan bahs Nyu-Yorkning mashhur beysbol jamoasi «Nyu-York Yankis»ning uy stadionida o‘tkazilishi mumkin.

Eslatib o‘tamiz, 7 mart kuni «Reksem» Angliya Kubogining 1/8 finalida Londonning «Chelsi» jamoasi bilan kuch sinashadi. Ayni damda Chempionshipning 35-turidan so‘ng «Reksem» 57 ochko bilan turnir jadvalida 6-o‘rinni egallab turibdi.

«Liverpul» esa APL turnir jadvalida 29 o‘yindan so‘ng 48 ochko bilan 5-pog‘onada bormoqda.