Kuni kecha «Real» klubi Kilian Mbappe va Jud Bellingemni qo‘shimcha mutaxassislar ko‘rigi uchun tegishlicha Parij va Londonga yuborgani ma’lum bo‘lgan edi. «Qaymoqranglilar» bosh murabbiyi Alvaro Arbeloa ushbu mavzuga doir fikrlarini bildirdi.

«Jud va Kilianning jarohatlari bilan bog‘liq barcha jarayonlar «Real» tibbiy xizmati va jismoniy tayyorgarlik departamenti tomonidan to‘liq tashkillashtirilgan. Bilasizmi, Bellingem va Mbappe London hamda Parijga «Real»ning o‘z mutaxassislari hamrohligida yo‘l olishdi. Shunday ekan, hamma narsa klub nazorati ostida turibdi», — dedi Arbeloa matbuot anjumanida.

Hozirda Alvaro Arbeloa «Real»ni La Liga doirasidagi «Selta»ga qarshi bo‘lib o‘tadigan safar o‘yiniga tayyorlamoqda.