«Barselona» hujumchisi Robert Levandovski o‘zining kelajagi borasidagi fikrlari bilan o‘rtoqlashdi.
«Men yaqin uch oy ichida bir qarorga kelaman. Barselonada biz uchun kerak bo‘lgan hamma narsa bor, oilam va men o‘zimizni bu yerda juda qulay his qilmoqdamiz», — dedi Levandovski Sky Sports nashriga bergan intervyusida.
Avvalroq, «Barselona» 37 yoshli hujumchi bilan shu yozda tugaydigan shartnomani uzaytirish niyatida emasligi haqida xabarlar tarqalgan edi. Shuningdek, ushbu vaziyat fonida polshalik futbolchi professional faoliyatini butunlay yakunlashi mumkinligi haqidagi mish-mishlar ham paydo bo‘ldi.
Ma’lumot uchun, Levandovski 2022 yildan buyon «Barselona» sharafini himoya qilib kelmoqda. Joriy mavsumda hujumchi barcha turnirlarda 32 ta o‘yinda maydonga tushib, 14 ta gol urdi va uchta golli uzatmani amalga oshirdi.
