«Barselona» o‘z maydonida «Atletiko Madrid»ni 3:0 hisobida mag‘lub etdi, biroq Ispaniya Kubogining yarim final bosqichida turnirdan chiqib ketdi. Sababi, bundan avval Madridda kechgan bahsda kataloniyaliklar 0:4 hisobida imkoniyatni boy berishgan edi. «Ko‘k-anorranglilar» ustozi Xans-Diter Flik qayd etilgan natija haqida o‘z fikrlarini bildirdi.
«Javob o‘yini oldidan muxlislar bizni qanday kutib olishgani shunchaki aql bovar qilmaydigan darajada edi. Keyin bu kayfiyat o‘yinga ham ko‘chdi. Ishqibozlar bilan aloqa ajoyib darajada bo‘ldi. Hamma oxirigacha harakat qildi. Keyingi bosqichga o‘ta olmaganimizni tan olishimiz kerak. Ammo bunday darajadagi o‘yin jamoaga navbatdagi uchrashuvlar oldidan ishonch bag‘ishlaydi», — dedi Flik jurnalistlarga.
Shanba kuni, 7 martda «Barselona» Ispaniya chempionati doirasida safarda «Atletik Bilbao»ga qarshi maydonga tushadi.
