«Барселона» ўз майдонида «Атлетико Мадрид»ни 3:0 ҳисобида мағлуб этди, бироқ Испания Кубогининг ярим финал босқичида турнирдан чиқиб кетди. Сабаби, бундан аввал Мадридда кечган баҳсда каталонияликлар 0:4 ҳисобида имкониятни бой беришган эди. «Кўк-анорранглилар» устози Ханс-Дитер Флик қайд этилган натижа ҳақида ўз фикрларини билдирди.
«Жавоб ўйини олдидан мухлислар бизни қандай кутиб олишгани шунчаки ақл бовар қилмайдиган даражада эди. Кейин бу кайфият ўйинга ҳам кўчди. Ишқибозлар билан алоқа ажойиб даражада бўлди. Ҳамма охиригача ҳаракат қилди. Кейинги босқичга ўта олмаганимизни тан олишимиз керак. Аммо бундай даражадаги ўйин жамоага навбатдаги учрашувлар олдидан ишонч бағишлайди», — деди Флик журналистларга.
Шанба куни, 7 мартда «Барселона» Испания чемпионати доирасида сафарда «Атлетик Бильбао»га қарши майдонга тушади.
