«Barselona» bosh murabbiyi Xans-Diter Flik o‘z sha’niga aytilayotgan tanqidlarga munosabat bildirdi.
«Odamlar doimo: «Yuqori chiziq, chiziq!» deb gapirishadi. Lekin bu unchalik to‘g‘ri emas. Biz qanchalik yuqorida o‘ynashimiz yoki himoya chizig‘ida qaysi futbolchilar bo‘lishi muhim emas. Eng muhimi — qanday pressing qilayotganimiz. Agar biz yaxshi pressing qilsak, yuqori himoya chizig‘i ish beradi. Aks holda, raqib bizga osonlik bilan hujum qilishi mumkin», — deya Flikning so‘zlaridan iqtibos keltirmoqda Barça Universal.
Eslatib o‘tamiz, Ispaniya chempionatining 27-turida «Barselona» safarda «Atletik»ni mag‘lub etdi. 68-daqiqada Lamin Yamal tomonidan kiritilgan yagona gol o‘yin taqdirini hal qildi.
Shuni ta’kidlash joizki, «Barselona» so‘nggi to‘rtta o‘yinning uchinchisida o‘z darvozasi daxlsizligini saqlab qoldi.
