As nashrining xabar berishicha, «Real» Emirates aviakompaniyasi bilan hamkorlik shartnomasini 2031 yilga qadar uzaytirishga yaqin turibdi.
Madrid klubi BAA aviakompaniyasi bilan 2013 yildan beri hamkorlik qilib kelmoqda. O‘sha vaqtdan buyon homiy logotipi «Real» liboslarining old qismidan joy olgan. Bundan tashqari, hozirda HP texnologik kompaniyasi va Adidas bilan ham kelishuvlarni uzaytirish bo‘yicha muzokaralar olib borilmoqda.
Manbaning ta’kidlashicha, «Real»ning maqsadi o‘yin formasidagi reklamalardan yiliga taxminan 300 million yevro daromad olishdan iborat. Bu bazaviy summa bo‘lib, jamoaning sportdagi muvaffaqiyatlariga qarab yanada oshishi mumkin.
Hozirgi vaqtda «Real» libosidagi homiylardan tushadigan umumiy daromad 260 million yevroni tashkil etadi. Taqqoslash uchun, «Manchester Yunayted»da bu ko‘rsatkich taxminan 200 million, «Barselona»da esa 183 million yevroga teng.
