«Barselona» prezidenti Joan Laporta jamoaning sobiq murabbiyi Xavi Ernandesning yaqinda bergan bayonotlariga munosabat bildirdi.

«Ko‘k-anorranglilar»ning sobiq ustozi o‘z iste’fosini yodga ola turib, Laportani yolg‘onchilikda va ziddiyatli fikrlar bildirishda ayblagan edi.

«Xavining ishdan bo‘shatilishiga sabab — u bo‘shashdi va murabbiylik faoliyatini oilaviy hayot bilan to‘liq birlashtira olmay qoldi. O‘shanda u «Barselona» yaqin ikki yil ichida «Real» va Yevropaning boshqa grandlari bilan raqobatlasha olmaydi, deb bayonot bergandi. Uning bu so‘zlaridan keyin men unga qo‘ng‘iroq qildim va biz bunday kelishmaganimizni aytdim. U esa gaplari noto‘g‘ri tushunilganini bildirdi. Biroq oradan to‘rt-besh kun o‘tib, u tarkibni tubdan o‘zgartirishni talab qildi va o‘shanda men u «Barselona»da ishlashda davom eta olmasligi haqida qaror qabul qildim», — deya Laportaning so‘zlaridan iqtibos keltirmoqda BarcaTimes.

Xavi 2024 yilning may oyida iste’foga chiqarilgan edi. Uning o‘rnini Xans-Diter Flik egalladi.