«Барселона» президенти Жоан Лапорта жамоанинг собиқ мураббийи Хави Эрнандеснинг яқинда берган баёнотларига муносабат билдирди.
«Кўк-анорранглилар»нинг собиқ устози ўз истеъфосини ёдга ола туриб, Лапортани ёлғончиликда ва зиддиятли фикрлар билдиришда айблаган эди.
«Хавининг ишдан бўшатилишига сабаб — у бўшашди ва мураббийлик фаолиятини оилавий ҳаёт билан тўлиқ бирлаштира олмай қолди. Ўшанда у «Барселона» яқин икки йил ичида «Реал» ва Европанинг бошқа грандлари билан рақобатлаша олмайди, деб баёнот берганди. Унинг бу сўзларидан кейин мен унга қўнғироқ қилдим ва биз бундай келишмаганимизни айтдим. У эса гаплари нотўғри тушунилганини билдирди. Бироқ орадан тўрт-беш кун ўтиб, у таркибни тубдан ўзгартиришни талаб қилди ва ўшанда мен у «Барселона»да ишлашда давом эта олмаслиги ҳақида қарор қабул қилдим», — дея Лапортанинг сўзларидан иқтибос келтирмоқда BarcaTimes.
Хави 2024 йилнинг май ойида истеъфога чиқарилган эди. Унинг ўрнини Ханс-Дитер Флик эгаллади.
