9 mart oqshomida Angliya Kubogining chorak final uchrashuvlari uchun qur’a tashlash marosimi bo‘lib o‘tdi. Unda sobiq futbolchilar Darren Fletcher, Alli Makkoyst, Jo Koul va Jo Xart ishtirok etdilar.

Qur’a natijalariga ko‘ra, quyidagi juftliklar shakllandi:

• «Sautgempton» – «Arsenal»

• «Chelsi» – «Port Veyl»

• «Manchester Siti» – «Liverpul»

• «Vest Xem» yoki «Brentford» – «Lids»

Musobaqaning so‘nggi ishtirokchisi 9 mart kuni tunda bo‘lib o‘tadigan uchrashuv yakunlariga ko‘ra aniqlanadi.

Chorak final bosqichi doirasidagi o‘yinlar 4 va 5 aprel kunlari bo‘lib o‘tadi. Turnirning avvalgi mavsumi «Kristal Pelas» klubining g‘alabasi bilan yakunlangan edi, biroq jamoa bu gal oltinchi divizion vakili «Maklsfild»ga mag‘lub bo‘lib, musobaqani erta bosqichda tark etdi.