Londonning «Tottenxem» klubi sobiq murabbiyi Rayan Meyson jamoaga qaytishi mumkin. Bu haqda Football Insider portali xabar bermoqda.
Manbaning ma’lumotlariga ko‘ra, 2018 yildan 2025 yilgacha «Tottenxem»da turli lavozimlarda ishlagan 34 yoshli mutaxassis «shporlar»ni boshqarishi mumkin. Ta’kidlanishicha, Meyson jamoa boshqaruvida barcha uchta poytaxt derbisida mag‘lubiyatga uchragan Igor Tudorning o‘rnini egallash uchun asosiy nomzod hisoblanadi.
Aytib o‘tish joizki, Meyson faqat «Vest Bromvich»da bosh murabbiy sifatida faoliyat yuritgan. U ushbu klubni 2025 yil iyuldan 2026 yil yanvargacha boshqargan edi.
«Tottenxem» Premyer-liganing 29-turidan so‘ng 29 ochko jamg‘argan holda turnir jadvalida 16-o‘rinni egallab turibdi.













