Лондоннинг «Тоттенхэм» клуби собиқ мураббийи Райан Мэйсон жамоага қайтиши мумкин. Бу ҳақда Football Insider портали хабар бермоқда.
Манбанинг маълумотларига кўра, 2018 йилдан 2025 йилгача «Тоттенхэм»да турли лавозимларда ишлаган 34 ёшли мутахассис «шпорлар»ни бошқариши мумкин. Таъкидланишича, Мэйсон жамоа бошқарувида барча учта пойтахт дербисида мағлубиятга учраган Игор Тудорнинг ўрнини эгаллаш учун асосий номзод ҳисобланади.
Айтиб ўтиш жоизки, Мэйсон фақат «Вест Бромвич»да бош мураббий сифатида фаолият юритган. У ушбу клубни 2025 йил июлдан 2026 йил январгача бошқарган эди.
«Тоттенхэм» Премьер-лиганинг 29-туридан сўнг 29 очко жамғарган ҳолда турнир жадвалида 16-ўринни эгаллаб турибди.













