«Barselona» yarim himoyachisi Fermin Lopes Chempionlar ligasining o‘tgan mavsum yarim finalida Milanning «Inter» jamoasidan uchralgan mag‘lubiyatni yodga oldi.
«Chempionlar ligasi yarim finalida «Inter»dan uchralgan mag‘lubiyat juda og‘ir bo‘lgandi, ammo biz bundan ko‘p narsani o‘rgandik. Finalga chiqish va g‘olib bo‘lish uchun nimalarni yaxshilashimiz kerakligini tushunib yetdik», — deya Lopesning so‘zlarini keltiradi Barça Universal.
Chempionlar ligasining joriy mavsumida «Barselona» 1/8 final bosqichiga qadar yetib keldi. Bugun, 10 mart kuni Xans-Diter Flik shogirdlari ushbu bosqichdagi ilk o‘yinni «Nyukasl»ga qarshi o‘tkazishadi. Bahs Angliyada bo‘lib o‘tadi va Toshkent vaqti bilan tungi soat 01:00 da boshlanadi.
