«Inter» hujumchisi Lautaro Martines faoliyatini Angliya Premyer-ligasida davom ettirishi mumkin.

La Nacion nashri bergan ma’lumotlarga ko‘ra, argentinalik futbolchining transferiga «Chelsi» qiziqish bildirmoqda. London klubi shu yozda hujumchining yirik transferini amalga oshirishga tayyorgarlik ko‘rmoqda va Martines uchun 100 million yevro to‘lashga tayyor. 28 yoshli futbolchi «ko‘klar»ning hujum chizig‘ini kuchaytirish uchun asosiy nomzod bo‘lib turibdi.

Lautaro Martines 2018 yilda «Rasing»dan «Inter»ga 25 million yevro evaziga o‘tgan edi. Uning amaldagi shartnomasi 2029 yilning 30 iyuniga qadar mo‘ljallangan. Joriy mavsumda argentinalik futbolchi milanliklar safida barcha musobaqalarda 35 ta o‘yin o‘tkazib, 18 ta gol urdi va 4 ta golli uzatmani amalga oshirdi. Transfermarkt portali hujumchining transfer qiymatini 85 million yevroga baholamoqda.