O‘zbekiston Superligasining 3-turidan o‘rin olgan «Surxon» — «Bunyodkor» uchrashuvi golsiz durang bilan yakunlandi. Bahsda har ikki jamoa bir qator xavfli vaziyatlar yaratgan bo‘lsa-da, darvozalar daxlsiz qoldi.

Uchrashuvning dastlabki daqiqalaridayoq mehmonlar faollik ko‘rsatdi. 5-daqiqada Dmitriy Pletnyov darvoza tomon zarba yo‘lladi, ammo «Surxon» posboni Davron Merganov ishonchli seyv namoyish etdi. 13-daqiqada «Bunyodkor» futbolchisi Behruz Shaydulovga nisbatan qo‘pol o‘ynagan Behruz Toshmirzayev sariq kartochka bilan jazolandi.

16-daqiqada mezbonlar javob qaytardi. Doston Tursunov raqib jarima maydoniga kirib borib zarba berdi, ammo to‘p noaniq ketdi. 27-daqiqada Stiven Chineduning uzoq masofadan yo‘llagan zarbasi darvoza to‘sini yonidan o‘tib ketdi. Oradan ko‘p o‘tmay Sunatilla Abdullajonov ham xavfli vaziyat yaratdi, biroq «Bunyodkor» darvozaboni Abduljalilov o‘z o‘rnida edi.

Birinchi bo‘lim oxirida har ikki jamoa yana bir nechta imkoniyatlarga ega bo‘ldi. Xususan, 35-daqiqada «Bunyodkor» qarshi hujum uyushtirdi, ammo Behruz Karimov ochiq qolgan darvozani goldan saqlab qoldi. 42-daqiqada esa Abdullajonovning zarbasini Abduljalilov ushlab oldi. Shu tariqa jamoalar tanaffusga 0:0 hisobida yo‘l oldi.

Ikkinchi bo‘limda ham kurash ancha keskin kechdi. 52-daqiqada Xumoyun Sherbo‘tayev kuchli zarba berdi, biroq to‘p nishonga aniq bormadi. 64-daqiqada Behruz Karimov uzoq masofadan darvozaga yo‘l topishga urindi, ammo zarba yuqoridan ketdi.

Uchrashuvning eng dramatik pallalari so‘nggi daqiqalarga to‘g‘ri keldi. 70-daqiqada Davron Merganov yana bir ajoyib seyv amalga oshirib, jamoasini muqarrar goldan qutqardi. Oradan ko‘p o‘tmay Sarvar Abduhamidov to‘pni darvozaga kiritdi, ammo VAR tekshiruvidan so‘ng ofsayd sabab gol bekor qilindi.

Bahs oxirida «Bunyodkor» ham gol urdi, ammo bu safar ham VAR aralashib, gol haqiqiy emasligi aniqlandi. Qo‘shib berilgan daqiqalarda hisob o‘zgarmadi va uchrashuv 0:0 hisobida yakunlandi.

Shu tariqa, keskin kurashlarga boy o‘tgan bahsda jamoalar bittadan ochko bilan kifoyalandi. Bu Superliganing joriy mavsumidagi ilk durang bo‘ldi.

Superliga. 3-tur
"SURXON" - "BUNYODKOR" - 0:0