Italiya ommaviy axborot vositalarining xabar berishicha, "Yuventus"ning serbiyalik hujumchisi Dushan Vlaxovich og‘ir jarohatdan so‘ng to‘liq tiklandi. Serb ushbu jarohatni o‘tgan yilning noyabr oyida olgan edi. Chorshanba kuni u "byankonerilar" tarkibida to‘liq mashg‘ulot o‘tkazdi.

Kutilishicha, Vlaxovich A Seriyaning navbatdagi turidan o‘rin olgan "Udineze"ga qarshi o‘yin uchun "Yuve" qaydnomasidan joy oladi.

Joriy mavsumda Vlaxovich jarohat olguniga qadar barcha turnirlarda jami sakkizta samarali harakatni amalga oshirishga ulgurgan edi: oltita gol va ikkita golli uzatma. Transfermarkt portali 26 yoshli hujumchini 35 million yevroga baholamoqda. Uning "Yuve" bilan shartnomasi kelayotgan yozning o‘rtasiga qadar amal qiladi.