«Real Madrid» bosh murabbiyi Alvaro Arbeloa jamoaning yosh futbolchisi Tyago Pitarchni maqtadi. Shu haftada ushbu o‘yinchi Chempionlar ligasi 1/8 finali doirasidagi «Manchester Siti»ga qarshi bahsda madridliklarning asosiy tarkibida maydonga tushdi.
Ko‘plab ekspertlar va futbol ishqibozlari uchun kutilmagan tarzda, «Real» 3:0 hisobida g‘alaba qozondi. Pitarch uchrashuvning 76-daqiqasida zaxiraga olindi.
«Odamlar yosh futbolchilarga shubha bilan qarashlarini tushunaman, lekin menda Pitarch borasida hech qanday ikkilanish yo‘q edi. Tyago — juda yaxshi futbolchi, men u uchun xursandman», — deya Arbeloaning so‘zlarini keltirmoqda jurnalist Fabrisio Romano.
Ertaga «Real» Ispaniya chempionati doirasida o‘z maydonida «Elche»ga qarshi bahs olib boradi.
