Londonning "Chelsi" klubi himoyachisi va yetakchisi Ris Jeyms "ko‘klar" bilan shartnomani uzaytirgandan so‘ng o‘z fikrlari bilan o‘rtoqlashdi.

"Doim eng yaxshi yillarim shu yerda o‘tishini istashimni aytganman va klub muvaffaqiyatlarini yanada oshirish uchun bizda barcha imkoniyatlar borligiga chin dildan ishonaman. Rostini aytsam, bu qiyin qaror bo‘lmadi. Ishonamanki, oldinda bizni bundan ham yorqin g‘alabalar kutmoqda", — deya Jeymsning so‘zlarini keltiradi "Chelsi" matbuot xizmati.

Eslatib o‘tamiz, Jeyms "Chelsi" uchun shunchaki o‘yinchi emas, u besh yoshidan beri Kobxemda (klub akademiyasi). 26 yoshga to‘lgan "ko‘klar" tarbiyalanuvchisi, bir necha yil oldingi "Uigan"dagi qisqa muddatli ijarani hisobga olmaganda, biror marta London klubini tark etmagan.

Joriy mavsum doirasida Risning hisobida "Chelsi" uchun rasmiy turnirlarda 35 ta o‘yin mavjud. Ushbu bahslarda u ikkita gol urdi va oltita golli uzatmani amalga oshirdi.