"Milan" rahbariyati himoyachi Fikayo Tomori bilan shartnomani uzaytirish bo‘yicha muzokaralarni davom ettirmoqda. Jurnalist Matteo Morettoning xabar berishicha, garchi tomonlar bo‘lajak kelishuvning barcha detallarini hali to‘liq kelishib olmagan bo‘lsa-da, muloqot yaxshi ketmoqda.

"Milan" va Tomori yangi shartnoma borasida ilk bor o‘tgan yilning avgust oyida gaplashishni boshlashgan edi. Himoyachi klubda qolishni istaydi. Ta’kidlanishicha, unga Milan shahrida yashash va shu nomdagi jamoada to‘p tepish juda qulay.

Tomorining "rossonerilar" bilan amaldagi shartnomasi 2027 yilning yoziga qadar mo‘ljallangan. Transfermarkt portali futbolchini 20 mln yevroga baholamoqda. Joriy mavsumda angliyalik futbolchi A Seriyada 25 ta o‘yin o‘tkazib, 2 ta golli uzatmani amalga oshirdi.