"Милан" раҳбарияти ҳимоячи Фикайо Томори билан шартномани узайтириш бўйича музокараларни давом эттирмоқда. Журналист Маттео Мореттонинг хабар беришича, гарчи томонлар бўлажак келишувнинг барча деталларини ҳали тўлиқ келишиб олмаган бўлса-да, мулоқот яхши кетмоқда.
"Милан" ва Томори янги шартнома борасида илк бор ўтган йилнинг август ойида гаплашишни бошлашган эди. Ҳимоячи клубда қолишни истайди. Таъкидланишича, унга Милан шаҳрида яшаш ва шу номдаги жамоада тўп тепиш жуда қулай.
Томорининг "россонерилар" билан амалдаги шартномаси 2027 йилнинг ёзига қадар мўлжалланган. Transfermarkt портали футболчини 20 млн еврога баҳоламоқда. Жорий мавсумда англиялик футболчи А Серияда 25 та ўйин ўтказиб, 2 та голли узатмани амалга оширди.
