2030 yilgi Jahon chempionati mezbonlaridan biri bo‘lgan Marokash qirolligi futbol olamini hayratda qoldirishga tayyorlanmoqda. Mamlakatda turnirning asosiy arenasi bo‘lishi kutilayotgan muhtasham inshoot — "Grand Stad de Kasablanka" qurilishi boshlandi.
Ushbu stadion qad ko‘tarib bo‘lgach, bir vaqtning o‘zida 115 ming tomoshabinni o‘z bag‘riga sig‘dira oladi. Bu ko‘rsatkich bilan u nafaqat Marokashda, balki butun dunyodagi eng yirik futbol arenalaridan biriga aylanishi kutilmoqda.
Loyihaning umumiy qiymati taxminan yarim milliard dollarni tashkil etadi. Rejaga ko‘ra, mazkur stadion 2030 yilgi JCHning eng muhim uchrashuvlariga, xususan, final bahsiga mezbonlik qilish uchun asosiy nomzodlardan biri bo‘ladi. Zamonaviy me’morchilik va milliy an’analarni o‘zida mujassam etgan inshoot turnirning haqiqiy "tashrif qog‘ozi"ga aylanishi shubhasiz.
