2030 йилги Жаҳон чемпионати мезбонларидан бири бўлган Марокаш қироллиги футбол оламини ҳайратда қолдиришга тайёрланмоқда. Мамлакатда турнирнинг асосий аренаси бўлиши кутилаётган муҳташам иншоот — "Гранд Стад де Касабланка" қурилиши бошланди.

Ушбу стадион қад кўтариб бўлгач, бир вақтнинг ўзида 115 минг томошабинни ўз бағрига сиғдира олади. Бу кўрсаткич билан у нафақат Марокашда, балки бутун дунёдаги энг йирик футбол ареналаридан бирига айланиши кутилмоқда.

Лойиҳанинг умумий қиймати тахминан ярим миллиард долларни ташкил этади. Режага кўра, мазкур стадион 2030 йилги ЖЧнинг энг муҳим учрашувларига, хусусан, финал баҳсига мезбонлик қилиш учун асосий номзодлардан бири бўлади. Замонавий меъморчилик ва миллий анъаналарни ўзида мужассам этган иншоот турнирнинг ҳақиқий "ташриф қоғози"га айланиши шубҳасиз.