Belgiyaning «Bryugge» klubi hujumchisi Nikolo Tresoldi Londonning «Arsenal» klubi qiziqishlari doirasiga tushdi.

21 yoshli futbolchi Belgiya chempionatining joriy mavsumida 29 ta o‘yinda 12 ta gol urgan holda to‘purarlar poygasida peshqadamlik qilmoqda. Ingliz OAVlarining ma’lumotiga ko‘ra, «kanonirlar» asli italiyalik bo‘lgan ushbu nemis forvardining muvaffaqiyatlarini diqqat bilan kuzatib borishmoqda. Ma’lumki, Angliya grandi mavsumlar oralig‘ida hujum chizig‘ini kuchaytirishni rejalashtirmoqda va «Bryugge» yulduzi potensial nomzodlardan biri sifatida ko‘rilmoqda.

Transfermarkt portalining bahosiga ko‘ra, Nikolo Tresoldining bozor qiymati 13 million yevroni tashkil etadi. Umumiy hisobda futbolchi joriy mavsumdagi barcha musobaqalarda 47 ta bahsda maydonga tushib, 16 ta gol va beshta golli uzatmani o‘z hisobiga yozdirib qo‘ygan.