"Chelsi"ning ukrainalik futbolchisi Mixail Mudrik faoliyatini boshqa klubda davom ettirishi mumkin.

L’Equipe nashrining xabar berishicha, "Chelsi"ga 70 million yevroga tushgan va 2024 yilning dekabr oyidan beri doping-test natijasi ijobiy chiqqani sababli maydonga tushmayotgan yarim himoyachi o‘z faoliyatini Fransiya chempionatida qayta boshlashi mumkin. "Ko‘klar" deyarli ikki yillik o‘yin amaliyotisiz qolgan futbolchining formasini tiklab olishi uchun uni "Strasbur"ga ijaraga yuborish variantini jiddiy ko‘rib chiqmoqda.

London klubiga yaqin manbaning ma’lumotiga ko‘ra, Mudrik "agar unga ijara taklif qilinsa, bu chorlovni qabul qiladi".

Ta’kidlanishicha, klublar allaqachon muzokaralar olib bormoqda va Mixailning keyingi taqdiriga oydinlik kiritilishi bilan kelishuvga erishilishi mumkin. Eslatib o‘tamiz, futbolchiga to‘rt yillik diskvalifikasiya xavf solmoqda, biroq "Chelsi" Mudrikni qo‘llab-quvvatlashda davom etmoqda va uning aybsiz ekanligini ta’kidlamoqda.