"Челси"нинг украиналик футболчиси Михаил Мудрик фаолиятини бошқа клубда давом эттириши мумкин.
L’Equipe нашрининг хабар беришича, "Челси"га 70 миллион еврога тушган ва 2024 йилнинг декабрь ойидан бери допинг-тест натижаси ижобий чиққани сабабли майдонга тушмаётган ярим ҳимоячи ўз фаолиятини Франция чемпионатида қайта бошлаши мумкин. "Кўклар" деярли икки йиллик ўйин амалиётисиз қолган футболчининг формасини тиклаб олиши учун уни "Страсбур"га ижарага юбориш вариантини жиддий кўриб чиқмоқда.
Лондон клубига яқин манбанинг маълумотига кўра, Мудрик "агар унга ижара таклиф қилинса, бу чорловни қабул қилади".
Таъкидланишича, клублар аллақачон музокаралар олиб бормоқда ва Михаилнинг кейинги тақдирига ойдинлик киритилиши билан келишувга эришилиши мумкин. Эслатиб ўтамиз, футболчига тўрт йиллик дисквалификация хавф солмоқда, бироқ "Челси" Мудрикни қўллаб-қувватлашда давом этмоқда ва унинг айбсиз эканлигини таъкидламоқда.
