"Manchester Siti" bosh murabbiyi Xosep Gvardiola dushanba kuni mashg‘ulot o‘tkazmaslik haqidagi qaroriga batafsil izoh berdi:
"Biz chorshanba kuni Madridda edik, mehmonxonaga kech qaytdik, biroz uxlab, ertalab ortga uchib keldik. Shundan so‘ng bizda mashg‘ulot bo‘lmadi, keyin Londonga yo‘l oldik ("Vest Xem"ga qarshi o‘yin uchun) va u yerdan faqat kecha tungi soat 02:30 da qaytdik. Shu sababli bugun — tiklanish kuni. Hech narsa qilish mumkin emas, futbolchilar uyda. Ertaga esa mashg‘ulot o‘tkazamiz.
Mashg‘ulot bizni "Real" bilan o‘yin oldidan kuchliroq qilib qo‘ymaydi. Zamonaviy futbolda top-jamoalar uchun mashg‘ulotlar endi katta o‘zgarish yoki o‘sish bermaydi. Futbolchilar shundoq ham nima qilish kerakligini tushunishadi, chunki bizda shunchaki mashg‘ulot uchun vaqt yo‘q. Shu bois men uyda qolishga qaror qildim. Ertaga esa soat 15:00 yoki 16:00 da emas, balki 14:00 da kelamiz. Maydonda biroz oyoq chigalini yozamiz. Biz ularga: "Quloq solinglar, mana buni qilib ko‘ringlar", deymiz va tamom — undan keyin o‘yin boshlanadi", — dedi Gvardiola jurnalistlarga.
"Manchester Siti" va "Real" o‘rtasidagi uchrashuv 17 mart kuni Toshkent vaqti bilan 18 martga o‘tar kechasi soat 01:00 da boshlanadi. Birinchi o‘yinda madridliklar 3:0 hisobida g‘alaba qozongan edi.
