Fransiya terma jamoasi va «Chelsi» sobiq yarim himoyachisi Emmanuel Peti jurnalist Daniel Rioloning «PSJ» Chempionlar ligasi chorak finalida «Liverpul» to‘sig‘idan qiyinchiliksiz o‘tadi, degan fikriga qo‘shilmadi.

Bundan avvalroq parijliklar 1/8 finalning ikki o‘yinida «Chelsi»ni tor-mor etgan edi (5:2, 3:0). Shundan so‘ng Riolo: «PSJ» o‘tgan yilgidan kuchliroq, «Liverpul» esa kuchsizroq», — deb bayonot bergandi.

«Men bu qadar qat’iy fikrda emasman. To‘g‘ri, «PSJ» «Chelsi»ga qarshi o‘yinlarda ishonib bo‘lmas darajada ustunlik ko‘rsatdi, ammo hali ishlash kerak bo‘lgan jihatlar bor.

Eng avvalo, menga «biz atigi uch hafta ichida yangi «Pari Sen-Jermen»ni kashf qildik», deb aytmang. Joriy mavsumda Chempionlar ligasida ko‘rganlarimizdan kelib chiqib, men har qanday taxminlardan o‘zimni tiyib turaman», — dedi Peti After Foot ko‘rsatuvida.