"Buxoro" klubining tajribali hujumchisi, Gruziya milliy terma jamoasi sobiq futbolchisi Nika Kacharava ilk bor klub matbuot xizmatiga o‘z fikrlari bilan o‘rtoqlashdi.

— Nika, avvalo jarohatdan tuzalib maydonga qaytganingiz bilan tabriklaymiz. Superliganing 4-turida jamoamiz safida debyut qildingiz. Yangi mamlakat va chempionatga moslashish jarayonlari qanday kechmoqda?

— Jarohatdan keyin yana maydonga qaytganimdan men ham xursandman. Keyingi uchrashuvlarda ham maydonga tushib, jamoamga yordam berishni intiqlik bilan kutyapman. Moslashish jarayonlari juda yaxshi kechmoqda.

— «Buxoro» jamoasiga qo‘shilish varianti qanday paydo bo‘ldi? O‘zbekiston futboli haqida qanday ma’lumotlarga ega edingiz?

— Barchasi juda tez sodir bo‘ldi. Yil boshida «Buxoro» jamoasidan taklif oldim. Bu taklifni qabul qilish haqida ko‘p o‘ylab o‘tirmadim, chunki O‘zbekiston chempionatida o‘ynagan do‘stlarim orqali ko‘plab ijobiy fikrlarni eshitgan edim. Shu bois qaror qabul qilish qiyin bo‘lmadi.

— Faoliyatingiz davomida turli kuchli chempionatlarda o‘ynagansiz. O‘zbekiston Superligasi darajasi haqida qanday fikrdasiz?

— Hozircha Superligada faqat bitta o‘yin o‘tkazdim, shuning uchun taqqoslashga hali erta deb o‘ylayman. Ammo ko‘rganlarimdan kelib chiqib aytishim mumkinki, futbolchilar jismoniy jihatdan juda kuchli.

— «Buxoro» chempionatni muvaffaqiyatli boshladi. Jamoaning dastlabki o‘yinlari haqida fikringiz qanday?

— Haqiqatan ham yaxshi start oldik. Ortda qolgan o‘yinlarda yigitlar yaxshi o‘yin namoyish etishdi. O‘yindan o‘yinga o‘zimizga bo‘lgan ishonch oshib bormoqda. Keyingi uchrashuvlarda ham shu ruhda davom etishimiz kerak.

— Bilamiz, otangiz Kaxaber Kacharava o‘z vaqtida Gruziyada mashhur futbolchi bo‘lgan. Futbolga kirib kelishingizda uning ta’siri bo‘lganmi?

— Albatta, futbol o‘ynashni boshlashimga eng katta sabab — otam. Yoshligimda uning o‘yinlarini ko‘rib katta bo‘lganman va doim unga o‘xshashni orzu qilardim.

— Muxlislarimiz bu mavsumdan sizdan katta umid qilishmoqda.

— Mening ham bu mavsumdan umidlarim katta. Muxlislar ishonchini his qilib turibman. «Buxoro» jamoasining g‘alabalariga o‘z gollarim bilan hissa qo‘shishga tayyorman.