«Tottenxem» inqirozining cheki ko‘rinmayapti — kecha jamoa o‘z maydonida «Nottingem Forest»ga 0:3 hisobida imkoniyatni boy berdi. Tur yakunlariga ko‘ra, «shporlar» Premyer-liga turnir jadvalida 17-o‘ringa tushib ketishdi. Londonliklar xavfli hududdan hamon bor-yo‘g‘i bir ochko oldinda bormoqda.

Yaqin orada «Tottenxem» Igor Tudorni iste’foga chiqarishi istisno etilmayapti. Xorvatiyalik mutaxassis jamoani fevral oyida qabul qilib olgan edi, biroq natijalarda ijobiy o‘zgarish kuzatilmadi.

The Telegraph nashrining xabar berishicha, klubda zaxira rejalari ishlab chiqilgan. Ushbu lavozimga Adi Xyutter asosiy nomzod sifatida ko‘rilmoqda. 56 yoshli avstriyalik murabbiy oktyabr oyida «Monako»dan ketganidan beri ishsiz yuribdi.