«Тоттенхэм» инқирозининг чеки кўринмаяпти — кеча жамоа ўз майдонида «Ноттингем Форест»га 0:3 ҳисобида имкониятни бой берди. Тур якунларига кўра, «шпорлар» Премьер-лига турнир жадвалида 17-ўринга тушиб кетишди. Лондонликлар хавфли ҳудуддан ҳамон бор-йўғи бир очко олдинда бормоқда.

Яқин орада «Тоттенхэм» Игор Тудорни истеъфога чиқариши истисно этилмаяпти. Хорватиялик мутахассис жамоани февраль ойида қабул қилиб олган эди, бироқ натижаларда ижобий ўзгариш кузатилмади.

The Telegraph нашрининг хабар беришича, клубда захира режалари ишлаб чиқилган. Ушбу лавозимга Ади Хюттер асосий номзод сифатида кўрилмоқда. 56 ёшли австриялик мураббий октябрь ойида «Монако»дан кетганидан бери ишсиз юрибди.