«Atletiko» yarim himoyachisi Markos Lyorente «Real»ga qarshi kechgan derbining (2:3) 1-bo‘limida Daniel Karvaxal bilan yuz bergan to‘qnashuv borasida o‘z fikrini bildirdi.

O‘yinning 10-daqiqasida Karvaxal «Real» jarima maydonchasi ichida Lyorente zarba berib bo‘lgan vaziyatda uni podkat bilan yiqitgan edi. Bosh hakam Xose Munuera Montero ushbu vaziyatda qoida buzilishini qayd etmadi.

«Buni muhokama qilishga arzimaydi. Bizga [hakam qarorini] hurmat qilishdan o‘zga chora qolmayapti, chunki e’tiroz bildirsangiz — sariq kartochka olasiz.

O‘zi nima bo‘lganini ham tushunmay qoldim. Zarba berdim va meni xuddi poyezd urib yuborgandek bo‘ldi — kimligini ham bilmadim. Yakunda VAR ham hakamga yordam bermadi, hammasi juda tez sodir bo‘ldi.

Hakamga ham juda qiyin ekanligini tushunamiz, lekin menimcha, VAR aynan shunday vaziyatlarda yordam berish uchun bor. Agar ular hech qanday yomon ish bo‘lmadi deb hisoblashsa... Bunday holatda hujumchiga kimdir kelib urishi uchun zarba berishidan ma’no yo‘q. Zarba berib bo‘lgani uchun bu oddiy hol deb hisoblanadi, shundaymi?» – dedi Lyorente.