Madridning «Real» klubi va Germaniya terma jamoasi himoyachisi Antonio Ryudiger o‘zining himoyadagi agressiv o‘yin uslubi tanqid qilinishiga javob qaytardi.

Futbolchi uning o‘yini klub va terma jamoa uchun muammo ekani haqidagi fikrlarga munosabat bildirdi.

«Men, albatta, jamoalarim uchun hech qanday xavf tug‘dirmayman. Maydonda qaysi daqiqada ekanimizni va o‘yinda nima qo‘yilganini juda yaxshi tushunaman. Ammo bu muhokama menga yana bir bor shundan dalolat berdiki, ba’zi hollarda vazifalarimni to‘liq darajada bajara olmaganman», — dedi Ryudiger.

Eslatib o‘tamiz, La Liganing 26-turidan o‘rin olgan «Xetafe»ga qarshi uchrashuvda (0:1) Ryudiger raqib futbolchisi Diyego Rikoning yuziga tizzasi bilan zarba bergandi. Riko og‘riq his qilib, maydonda yotib qoldi va o‘yin vaqtincha to‘xtatildi. Bosh hakam Alexandro Munis Ruis tibbiy xodimlarni maydonga chaqirdi, ammo qoidabuzarlik qayd etilmadi.