Eron ayollar milliy terma jamoasining Osiyo Kubogidagi ishtirokidan so‘ng, Avstraliya hukumati futbolchilarga mamlakatda qolish va boshpana olishni taklif qilgan. Bu haqda Eron futbol federasiyasi vise-prezidenti Faride Shojayi ma’lum qildi.

Uning so‘zlariga ko‘ra, ushbu jarayonlar AQSH ko‘rsatmasi bilan amalga oshirilgan va futbolchilarga aeroportda bosim o‘tkazilgan.

“Avstraliyadan chiqib ketayotganimizda, aeroportda har bir futbolchini alohida xonaga olib kirishdi va bir nechta tarjimonlar hamrohligida mamlakatda qolishni so‘rashdi. Ular hatto buni AQSH hukumatining iltimosi deb ham aytishgan. AQSH va Avstraliya barcha futbolchilarimizni olib qolish uchun harakat qilishdi, biroq, xayriyatki, sportchilarimiz bu taklifni rad etishgan”, deydi Faride Shojayi Tasnim agentligiga bergan intervyusida.

Mazkur holat yuzasidan AQSH prezidenti Donald Tramp ham munosabat bildirgan. 9 mart kuni u ba’zi eronlik futbolchilar Avstraliya hukumatidan boshpana masalasida yordam olganini, jamoaning bir qismi esa o‘z ixtiyori bilan vatanga qaytishni tanlaganini ta’kidladi.

Ikki kun o‘tib, Avstraliya Ichki ishlar vaziri Toni Berk vaziyatga oydinlik kiritdi. Uning so‘zlariga ko‘ra, Avstraliya besh nafar eronlik futbolchiga mamlakatda qolish uchun viza berishga rozi bo‘lgan. Biroq ular oxirgi pallada taklifni rad etib, jamoasi bilan birga Eronga yo‘l olgan.