Zagrebning «Dinamo» klubi «Milan»ning 40 yoshli yarim himoyachisi Luka Modrichning vakillari bilan xorvatiyalik futbolchining jonajon klubiga qaytishi borasida aloqaga chiqdi. Bu haqda The Touchline nashri xabar bermoqda.
Biroq, Modrich yoshiga qaramay, hamon eng yuqori saviyada o‘ynashda davom etmoqchi ekanligi ta’kidlanmoqda. «Milan» klubi esa yangi shartnoma masalasi bilan faol shug‘ullanmoqda va kelishuv uzaytirilgani haqidagi rasmiy bayonot keyingi oydayoq e’lon qilinishi mumkin.
Luka Modrich — Zagrebning «Dinamo» klubi tarbiyalanuvchisi bo‘lib, jamoaning asosiy tarkibida 118 ta o‘yin o‘tkazgan, 32 ta gol urgan va 21 ta golli uzatmani amalga oshirgan.
Xorvatiyalik yarim himoyachi o‘tgan yozdan beri «Milan» sharafini himoya qilib kelmoqda. Ushbu davr mobaynida futbolchi 32 ta uchrashuvda maydonga tushib, raqiblar darvozasini ikki bor ishg‘ol qildi va uchta assist muallifiga aylandi.
